దొంగగారు అవాక్కయ్యారు!

కార్ సడంగా ఆగింది!

"ఏమైంది మహేష్?"

"సార్ ముందు స్కూటీ మీద వెళుతున్న అమ్మాయి స్కూటీలో నుంచి సెల్ పడిపోయింది." అంటూ కార్ దిగబోయాడు మహేష్.

రయ్య్య్య్య్య్య్య్య్య్య్య్య్ . . . . .

ఓ బైక్ దూసుకొచ్చింది.దాని మీద వున్న దొంగగారు  చటుక్కున కింద బడ్డ సెల్ అందుకొని ఫటుక్కున్న మాయమైపోయాడు.

డ్రైవరూ ,సారూ అవాక్కయ్యారు!

"మహేష్ తొందరగా పోనీయ్ ."

అంతే కార్ స్పీడ్ అందుకుంది.కాని బైక్ కనిపించలేదు!మాయదారి వాన మొదలైంది.

"సార్ అదిగో ఆ అమ్మాయి ఆ బస్ స్టాప్ లో ఆగి వుంది."

కార్ ఆ అమ్మాయి ముందు ఆగింది.ఆ అమ్మాయి ఆశ్చర్యంగా చూసింది!

కార్ లో నుంచి సార్ గారు దిగారు."అమ్మాయ్ నీ సెల్ వుందా ?" ఘంభీరంగా అడిగారు.ముందు బిత్తరపోయిన ఆ అమ్మాయి స్కూటీ పక్క కవరూ , తన పాకెట్సూ అన్నీ వెతుక్కొని లేదంకుల్ అంది గాభరగా.

"అక్కడ పడిపోయింది. మేము తీసే లోపలే ఎవడో దొంగ ఎత్తుకుపోయాడు. పట్టుకుందాం. ఫాలో మీ."

ముందు కార్, వెనుక స్కూటీ చేజింగ్ చేజింగ్ . . . . .

అయ్యో కార్ ను స్కూటీ కాదు బైక్ కోసం.

వాన పడుతూనే వుంది. . . . .

కరుడుగట్టిన స్మగ్లర్ జాన్ పాషా కోసం రా ఏజెంట్స్ రయ్ రయ్ మని చేజ్ చేస్తున్నారు.

"సార్" కెవ్వ్ కేక. "అదిగో ఆ షాప్ పక్కన బైక్ , ఆ దొంగ గారు”.

సర్ర్ ర్ర్ ర్ర్ మంటూ ఆ అబ్బాయి పక్కన కార్ ఆగింది.ఆ వెనుకే స్కూటీ. . . .

సార్ గారు చాలా ఘంభీరంగా కార్ దిగారు.సార్ గారు, డ్రైవర్ గారు, దొంగగారికి చెరో పక్కన నిలబడ్డారు. " ఊ ఆ సెల్ తీయ్."

"ఏ సెల్ సార్?" అమాయకంగా దొంగగారు.

"ఇందాక అక్కడ రోడ్ మీద పడ్డ ఈ అమ్మాయి సెల్ తీసుకున్నావు కదా అది,మర్యాదగా ఇస్తావా పోలీస్ లను పిలవమంటావా?"

అవాక్కయిన దొంగగారు జేబులో నుంచి సెల్ తీసి ఇచ్చారు!

ఆ సెల్ అందుకున్న అమ్మాయి థాంక్ యూ అంకుల్ అంది త్రిల్లింగ్ గా!

అమ్మయ్య మా ఆయనకు ఏమీ కాలేదు బాగానే వున్నారు అని నేను హాయిగా నిట్టూర్చాను. మరి లేకపోతే ఈ మధ్య ఏ ఎడ్వెంచర్సూ చేయటం లేదు.ఏ గాలో ధూళో సోకలేదు కదా!ఏమైనా మంత్రం వేయించాలా?ఎవరు వేస్తారు అని బెంగ పడిపోతున్నాను. అమ్మయ్య ఈ రోజు ఈ ఎడ్వెంచర్ చేసాము అని ఇంటికి రాగానే చెప్పారు.మరి బెంగతీరి హాపీసే కదా!