ప్రణయకలహమా ? ప్రళయకలహమా ?

నిన్న సాయంకాలం టైం 8 కావొస్తొంది . యధావిధిగా మా వారు టి.వి ముందు నేను బాల్కనీ లో సెటిల్ అయ్యాము . అంతకు కొద్ది సేపు ముందే వాన తగ్గిందమో , ఆ వానలో తడిసి న రెక్క నందివర్ధనం పూలు , ఆకులు స్ట్ర్రిట్ లైట్ వెలుగులో మెరుస్తున్నాయి . వాటిని చూస్తూ అప్పుడప్పుడే విచ్చుకుంటూ పరిమళాలు వెదజల్లుతున్న పారిజాతాలను ఆస్వాదిస్తూ నా లోకంలో నేనున్నాను . ఇంతలో . . .
" ఆగు . . . ఆగు " అని గట్టిగా వినిపించింది . ఇదేమిటబ్బా నేనేమి చేసాను నన్ను ఆగు ఆగు అంటున్నారు ఎవరో . నేనెవరితో మాట్లాడటం లేదే ! కొంపదీసి సినిమాలో లా నా మనసే కాదుకదా . ఐనా అదెందుకు ఆగమంటొంది అని ఆలోచిస్తూ వుండగా మళ్ళీ ఈసారి ఇంకొంచం ఘట్టిగా " ఆగు " అని వినిపించింది . ఊహల్లోనుంచి బయటపడి చుట్టూ చూసాను . రోడ్ మీద వక అబ్బాయి బైక్ మీద , ఓ అమ్మాయిని వెంబడిస్తూ ఆగు అని అరుస్తున్నాడు . నేను ఉలిక్కి పడ్డాను . వారం రోజుల నుంచి తెగ సినిమాలు చూసి భ్రమ పడుతున్నానా అనుకుంటూ కళ్ళు నులుము కొని మళ్ళీ చూసాను . ఓ అమ్మాయి విస విసా మా ఇంటి రోడ్ కు అవతలి వైపు నడుస్తోంది . ఓ అబ్బాయి ఆమెను ఆగు అని అరుస్తూ వెంబడిస్తున్నాడు . ఆ అమ్మాయి వెను తిరిగి నడిచింది . అతనూ బైక్ వెనక్కి తిప్పాడు . అలా ఇద్దరూ అటూ ఇటూ తిరిగారు . ఇంతలో అతను బైక్ ఆపి ఆ అమ్మాయి చేయి పట్టుకున్నాడు . ఆమె " వదులు . . . వదులు " అని గింజుకోసాగింది . ఏమైనా సినిమా షూటింగా అని చుట్టూ చూసాను . కెమెరాలు , లైట్ లు , మనుషులు ఎవరూ కనిపించలేదు . ఐతే ఈ సీను నిజం గానే నా కళ్ళెదుట జరుగుతోందన్నమాట అనుకొని ఏమి చేయాలో తోచక ఒక్క సెకను నిలబడి , లోపలి కి వెళ్ళి మావారికి చెప్పాను .
మా వారు గబ గబా వాళ్ళ దగ్గరకు వెళ్ళి ఆ అమ్మాయి చేయిని అతని నుంచి విడిపించి , ఆ అమ్మాయిని ఆయనవెనకే వెళ్ళిన మా పనమ్మాయి శైలజకు వప్ప చెప్పి , అతనిని దబాయించటం మొదలుపెట్టారు . వాల్లిద్దరూ ఈ పరిణామం వూహించలేదేమో బిత్తర పోయారు . ఆ అమ్మాయిని శైలజ గేట్ లోపలికి తీసుకొచ్చేసి గేట్ వేసేసింది . ఆ అమ్మాయి ఏడవటం మొదలు పెట్టింది . ఆ అబ్బాయేమో సారీ అంకుల్ తను నా కజిన్ అని చెపుతున్నాడు . మావారు అతని మాట వినకుండా గేట్ దగ్గరికొచ్చి అతను నీకు తెలుసా అని ఆ అమ్మాయిని అడిగారు . ఆ అమ్మాయి షాక్ లో వుందేమో జవాబు చెప్పకుండా ఏడుస్తోంది . ఇహ అంతే మా వారు విజృంభించేసారు . ఈ గొడవంతా చూస్తున్న పక్కింటి వాచ్మెన్ తో వాడిని పట్టుకో కట్టేసి పోలీసులను పిలుద్దాము అన్నారు . అప్పటి వరకు సారీ అంకుల్ , సారీ అంకుల్ అని బతిమిలాడుతున్నవాడల్లా పక్కకి పరిగెత్తాడు ఆ అబ్బాయి . ఆ అమ్మాయేమో నేను వెళ్ళిపోతానంకుల్ అని ఏడుస్తోంది . ఎక్కడికెళుతావు , మీ ఇల్లెక్కడో చెప్పు నేను వచ్చి దింపుతాను అని ఆ పిల్లను అరిచారు . అసలు ఆ అబ్బాయిని ఎందుకు ఎంకరేజ్ చేస్తున్నవమ్మా నువ్వు ? పద మీ ఇంటికి వచ్చి మీడాడీ తో మాట్లాడుతాను అని ఈయన , లేదంకుల్ నేను వెళ్ళిపోతాను అని ఆ అమ్మాయి కాసేపు వాదించుకున్నాక , శైలజా ఆ అమ్మాయిని లోపల్ కూర్చొబెట్టు , మాలా నా కార్ కీ తీసుకురా నాకు చెప్పారు . ఆ అమ్మాయి గోడు గోడు న ఏడుస్తూ మీరొద్దంకుల్ నేను వెళుతాను అన్నిది . మావారు , నువ్వు మాట్లాడకు ముందు లోపల కూర్చో అని , పక్కింటి వాచ్మెన్ తో
" నువ్వు ఆ అబ్బాయి , ఈ అమ్మాయి చేయిలాగటం చూసావా అని అడిగారు . చూసాను సార్ అన్నాడు . ఐతే ఎందుకు ఆపలేదు ? సినిమా చూస్తున్నావా ? నీకు అక్క చెల్లెళ్ళు లేరా ?"
( అరే ఈ డైలాగ్ అమ్మాయి అబ్బాయి తో అన్నట్లు చూపిస్తారే సినిమాలో ! మావారు అంటున్నారేమిటి చెప్మా !)
" వక చెల్లి వుంది సార్ "
" ఐతే మీ చెల్లెలిని ఇలా ఎవరైనా చేయి పట్టుకొని లాగుతుంటే నువ్వు వూరుకుంటావా ?"
అతను తల గోక్కుంటూ " వూ మ్హూ " .
ఇంతలో " ఏమైంది సారూ " అంటూ ఎల్లమ్మ వచ్చింది .
" ఏమైందా ? నువెటుబోయావ్ ఇప్పటి వరకు " అని ఎల్లమ్మను అరిచి ఆ అబ్బాయి వెళ్ళిపోయాడని గమనించారు . నేను కార్ కీస్ తీసుకొని చెప్పులేసుకొని వచ్చాను . ఆ అమ్మాయి నన్ను చూడగానే " ఆంటీ మీరొద్దు ప్లీజ్ నేను వెళుతాను " అంది . ఆ అమ్మాయి ని చూస్తే 17 / 18 ఏళ్ళ అమ్మాయిలా వుంది . చాలా లేతగా సుకుమారంగా వుంది మద్య మద్య చేయి వూదుకుంటోంది . చేయి ఎర్రగా కందిపోయింది . ఏం చదువుకుంటున్నవమ్మా నువ్వు అని అడిగాను . పలానా హాస్పిటల్ లో సిస్టర్ ట్రైనింగ్ అవుతున్నానండి అంది . నువ్వెక్కడుంటావు అన్నాను . అక్కడే హాస్టల్ లో వుంటానండి . మా పేరెంట్స్ వైజాగ్ లో వుంటారు అంది . ఆ హస్పిటల్ ఇక్కడికి చాలా దూరం . ఇక్కడిదాకా ఎందుకు వచ్చావు ? అసలు ఆ అబ్బాయి ఎవరు ? గొడవేంటి అసలు అని అడుగుతే రాంగ్ కాల్ వచ్చిందని అరుస్తున్నాడండి అంటుందే కాని ఆ అబ్బాయి తెలుసని కాని తెలీదు అని కాని చెప్పదు .
" ఫోన్ అంటూ వుంటే రాంగ్ కాల్స్ రాకుండా వుంటాయా ఏమిటి ? " అని శైలజ ఆశ్చర్యం .
ఇంతలో మావారు ఇంకో అబ్బాయిని తీసుకొని వచ్చారు . " ఇతను నీకు తెలుసా " అని అడిగారు . ఆ అమ్మాయి చెప్పేలోపలే అతను " తను మా చెల్లెలండి . మా పిన్ని కూతురు " అన్నాడు . ఆ అమ్మాయి అవునని తలాడించింది . ఇంకేంచేస్తాము ఆ అమ్మాయి వాలకం అనుమానంగా వున్నా అతను మా అన్నయ్య అని అతని తో వెళ్ళేందుకు సిద్దపడితే , మనమేమి చేయలేముగా ! ఇద్దరూ కలిసి వెళ్ళిపోయారు . ఆ సోకాల్డ్ అన్నయ్య థాంక్స్ అంకుల్ అని కూడా చెప్పాడు !
మొతం ఎనలైజ్ చేసుకుంటే , బహుషా ఇద్దరూ సోకాల్డ్ ప్రేమికులు . తిరిగేందుకుకు ఇటొచ్చారు . ఆ అమ్మాయి సెల్ కు ఎవరో అబ్బాయి కాల్ చేసాడు . అది చూసి ఈ అబ్బాయి అనుమానించాడు . అమ్మాయికి కోపం వచ్చింది . అలిగింది . ఆ అలక తీర్చే ప్రహసనమే ఇదంతా . మధ్యలో ఆమెను లోపల వుంచ్టము , అతనిని పోలీసులకు పట్టిస్తామనటం తో వెళ్ళిపోయి ఎవరో ఫ్రెండ్ కు కాల్ చేసి పిలిపించాడు . అతనొచ్చి ఆ అమ్మాయిని తీసుకెళ్ళాడు . అసలు కథ ఇదై వుంటుంది అనుకున్నాము .

ఏ కథ ఏమైనా మాకు ఆ అమ్మాయి గురించి చాలా బాధ కలిగింది . చాలా చిన్న పిల్ల లా వుంది . చదువుకోసమో , వుద్యోగం కోసమో ఆడపిల్లలు బయటకు వచ్చి వంటరి గా వుండక తప్పటం లేదు . కాని ఈ తప్పటడుగులు ఏమిటి ?
ఇహ మా విషయానికి వస్తే , ఆ అమ్మాయిని పంపించి మేము లోపలికి వస్తుంటే మా కాలనీ ప్రెసిడెంట్ అటుగా వచ్చారు . సరే నేను లోపలికి వచ్చేసాను . కాసేపు ఆయంతో మట్లాడి మావారు లోపలికి వచ్చి , " ప్రెసిడెంట్ కు జరిగింది చెప్పాను . ఈ ఆదివారం కాలనీ మీటింగ్ ఏర్పాటు చేయమన్నాను . " అన్నారు .
" ఎందుకు ?"
" ఎందుకా , ఈలోపల 30 లాఠీలు , 30 విజిల్స్ కొనుకొస్తాను . మీటింగ్ లో అందరికీ తలా వక లాఠీ , తలా వక విజిల్ ఇస్తాము . అనుకోకుండా ఏమైనా జరిగినప్పుడు ముందు చూసిన వాళ్ళు విజిల్ వూదితే అందరూ లాఠీలు తీసుకొని బయటకు వచ్చేట్లుగా ఏర్పాటు చేస్తాను ."
" మరి సమయానికి ఆ విజిల్ కనిపించక పోతే ?"
" నీకన్నీ ఇలాంటి తలతిక్క అనుమానాలే వస్తాయి . మొన్న మన పక్కింటావిడ గొలుసు ఎవడో గుంజారు . నేను చూసి వెళ్ళ బట్టి వాడు వదిలేసి వెల్లాడు ."
" అవునవును అందుకే ఆవిడెప్పుడూ మిమ్మలిని మెచ్చుకుంటూ వుంటుంది ."
" రెండు రోజుల క్రితం నువ్వు వాకింగ్ చేస్తూ , ఎవరో మన కాలినీలో కుక్కలకు బిస్కెట్లు వేస్తున్నాడని చెప్పావాలేదా ?"
" చెప్పాను . వారం రోజులుగా రోజూ వచ్చి వీధి కుక్కలకు బిస్కెట్లు వేస్తూ వుంటే , ఏ దొంగోడో , ఏ టెరరిస్టో అని భయం వేసింది . మీరు వాడిని అడ్రెస్స్ వగైరా అడిగాక రావటం మానుకున్నాడుకదా ?"
" మరి అదే . ఏదో వక అర్పాటు చేయకపోతే ఎలాగ? కాలనీ గూర్కా మీద ఆధారపడితే సరిపోదు . మనల్ని మనమూ రక్షించుకోవాలి . ఏదైనా జరగ గానే నాకెందుకులే అని వెళ్ళిపోతే ఎలా ? ఇప్పుడే చూడరాదు ఏమి జరిగిందో . అందరికీ సివిక్ సెన్స్ వుండాలి . "
" బాబోయ్ నాకు స్పీచులు ఇవ్వకండి . అసలు మనం ఈ కాలనీకి అన్ పేడ్ వాచ్ మెన్ ల మైపోయాము . ఇప్పుడు మీరు ఇచ్చే విజిల్ తో నా మనవళ్ళు ఆడుకొని ఎక్కడో పెట్టరనుకోండి . ఆ టైం కు నాకు దొర్కొద్దూ ? అసలే మనపిల్లలు హైడ్ అండ్ సీక్ ఆడుతూ వుంటారు . ఇప్పుడు నాకున్న డ్యూటీలలో ఈ లాఠీ ని , విజిల్ ని దాచటమొకటి కొత్తగా వచ్చిచేరింది . ఎక్కడ దాచను . అలమారలో పెడుదామంటే అలమారా కీస్ ఎప్పుడూ దొరికి చావవు . టైం కు దొరుకుతాయో ఏదో . ఇదంతా ఎందుకు నేనసలు బాల్కనీ లోనే కూర్చోకుండా వుంటే సరిపోతుంది " .
" ఏమైనా కానీ డాడీ ఇహ జన్మలో ఆ అబ్బాయి ఏ అమ్మాయి చేయీ పట్టుకోడు . అమ్మా నీకసలు విజిల్ వూదటం వచ్చా ?" అని అప్పుడే వచ్చి అంతా విన్న మా అమ్మాయి డైలాగు .
" అమ్ముమ్మకు రాకపోతే నేను వూదిపెడతాను . " మా విక్కి సరదా :)
పాపం వాళ్ళ ప్రణయ కలహం కాస్తా ప్రళయ కలహమైపోయింది . ఏమో ఏది ఏమైతే నాకేమిటి నేనిప్పుడు అర్జెంట్ గా విజిల్ వూదేటప్పుడు టెన్షన్ పడి గాలి మాత్రమే వచ్చేట్లు కాకుండా పెద్ద సౌండ్ వచ్చేట్లు వూదటము నేర్చుకోవాలి . లాఠీ తిప్పటం నేర్చుకోవాలి . ఐయాం సో బిజీ యార్ !!!!!