మా ఇంటి రామాయణం

" " అమ్మాయ్ మీ వేరు కాపురం వ్యవహారం ఏమైంది "
"ఇల్లదీ చూసుకోవాలిగా "
నేను చూస్తా అని పూనుకొని రోజూ తిరిగి ఇళ్ళువెతికారు .
చివరికి ఓ ఇల్లు మా అందరికీ నచ్చింది .
" రేపు పంచమి . పాలుపొంగించుకొని మారిపొండి " అన్నారు నాన్న గారు .
" అలాగే . మరి నావెంట అత్తగారిని తీసుకొని పోతాను ." అంది దుర్గ .
"అదా ! అదెందుకొస్తుంది ?" అన్నారు నాన్నగారు అయోమయం గా .
"ఏం వస్తే కోడలింటికి అత్తగారు రాకూడదా ?" అంది దుర్గ .
"అది నీ వెంట వస్తే నేనేమైపోవాలి ?" అడిగారు ఇంకా షాక్ నుంచి తేరుకోకుండానే .
" సాయం గా మీ అబ్బాయిని వుంచుకోండి !"
"వాడా - వాడెందుకు నాకు ?" అడిగారాయన .
" ఏం నెలతిరిగే సరికి ముప్పై వేలు సంపాదించి పెడుతారు .మా అత్తగారెందుకు మీకు ? తిని కూర్చొని తిక్కపనులు చేస్తుంది అని మీరే పొదస్తమానము అంటారుగా . ఆవిడను నాతో పంపించండి ." అంది దుర్గ .
" నువ్వు రమ్మన్నా అది రాదు . నీ ఎత్తులు దానికి తెలుసు . దానిని తీసుకెళ్ళి చాకిరీ చేయించుకోవాలని నీ ప్లాను " అన్నారు నాన్న .
" ఇక్కడ మాత్రం చాకిరీ చేయక తప్పుతోందా నాకు ? దుర్గ తో వెళితే పని చేసినా ఆదరం గా చూస్తుంది . ఎక్కడికైనా తీసుకెళ్ళి తిప్పి చూపిస్తుంది . నే వెళ్తా ." అంది అమ్మ .
హతాశులైపోయారు నాన్నగారు .
"ఏమిట్రా ఇదంతా ? బెల్లం కొట్టిన రాయిలా మాట్లాడవేం ?" అన్నారు నన్ను చూసి .
నేను చెప్పేది ఏముంది ? అయినా అమ్మా దుర్గా వెళ్ళిపోతే ఈయిన్ని పెట్టుకొని నేనేం చేస్తాను అందుకే " నేనూ దుర్గ తోనే వెళ్తా " అని చెప్పేశాను .
" నువ్వే గంగ లోనైనా దూకు .నీ భార్య నా భార్యని తీసుకుపోతానంటోంది కదా ! అదే నాకు తలనొప్పి " అన్నారాయన .
" బదులుగా నా భర్త ని సాయం వుంచుతానన్నానుగా - ఆయన వుండనంటే నేనేమి చేసేది .ఇప్పుడు నాకేమి బాధ లేదు. మా ఆయనా మా అత్తగారూ నాతో వస్తారుట . ఇక మీ ఇష్టం రేపు పంచమి , పాలు పొంగించుకొని మారిపోతాం !" అంది దుర్గ .
రాజ్యం కోల్పోయిన రాజులా ఢీలా పడిపోయారు నాన్నగారు . "
ఏమిటీ ఈ మామా కోడళ్ళ కొట్లాట మా ఇంటి రామాయణం అనుకుంటున్నారా ? కాదండీ బాబు ఎంతమాత్రం కాదు . అలా అపార్ధాలు చేసుకోకండి . మరేమిటంటారా ? ఇది " పొత్తూరి విజయలక్ష్మి " గారి " మా ఇంటి రామాయణం ." అదిగో మళ్ళీ అపార్ధం * * * ఆవిడింటి రామాయణం కాదండీ , ఆవిడ వ్రాసిన " మా ఇంటి రామాయణం " కథ లోని భాగమన్నమాట ! ఎలా వుంది ? బ్రహ్మాండం బద్దల్స్ కదా :) అసలు ఆ మామా కోడళ్ళు అలా ఎందుకు పోట్లాడుకుంటున్నారు ? పాపం ఆయనొక్కడిని ఇంట్లో వదిలేసి అందరూ వెళ్ళిపోవాలని అనుకుంటున్నారు ? తెలుసుకోవాలని కుతూహలం గా వుంది కదూ !
ఇంతే నా ,
" మరునాడు సరస్వతి రాగానే , " వంట సరస్వతీ ఇవన్నీ నాకు నువ్వు నేర్పాలి ." అన్నాడు . పదిపేజీలు వున్న జాబితా చూసి నోరావలించిందామె .
" చాలా ఇవన్నీ " అడిగింది సరస్వతి .
" ఇవి కాక ఇంకా చాలా నేర్చుకోవాలి " అన్నాడు .
" సరేలే పద . " అని కుక్కర్ తీయబోతే వారించాడు .
" అలా కాదు నాకు చెప్పు నేను చేస్తా " అన్నాడు .
" సరే ముందు బియ్యం , కందిపప్పు పట్టుకురా !" అంది కుర్చీలో కూర్చొని. బియ్యం తెచ్చి ఇచ్చి కందిపప్పు కోసం వెళ్ళిన వాడు అక్కడే వుండిపోయాడు .
"ఏం చేస్తున్నావ్ ప్రసాదరావ్ ?" అంది సరస్వతి .
"పప్పుకోసం వెతుకుతున్నా " అన్నాడు . వెళ్ళి చూస్తే స్టీల్ డబ్బాలన్నీ దించి మూతలు తీసిపెట్టి వున్నాయి . ఇంకా డబ్బాలు దించుతుంటే అడ్డుపడింది .
"ఇదిగో ఇక్కడే వుందిగా కందిపెప్పు ." అంది .
"ఏదీ ? ఎక్కడా ? " కళ్ళజోడు సర్ద్దుకుంటూ అడిగాడు .
"ఇదిగో , ఇక్కడా " అంది సరస్వతి .
" ఓ వండక ముందు ముద్దపప్పు ఇట్లా బద్దలుగా వుంటుందా ? నేనింకా ముద్దపప్పు డబ్బాలో కూడా పప్పు లాగే వుంటుందేమో అని వెతుకుతున్నా " అన్నాడు .
తల బాదుకుంది . " చంపావుపో , వండక ముందు పప్పెలా వుంటుందో తెలియనివాడివి నువ్వు వంటేం నేర్చుకుంటావు ప్రసాదరావ్ ?" అంది దీనంగా ."
ఈ ముద్దపప్పు ఎవరు ? ముద్దపప్పు వండేందుకు ఎందుకు తంటాలు పడుతున్నాడో తెలుసు కోవాలంటే "ప్రసాదరావూ - వంట సరస్వతి " చదవాలిసిందే :)
ఇంతేనా అంటే ఇంతేకాదు . ఇంకా వున్నాయి .
" శశికళ కాఫీలు తెచ్చింది . ఇద్దరికీ ఇచ్చింది .
కాఫీ తాగుతుండగా టెలిఫోన్ మోగింది . అదిరిపడి కాఫీ మీద పోసుకున్నాడు ఆనందరావు . " మళ్ళీ ఫోన్ వచ్చింది . ఏ అప్పులవాడో " అన్నాడు దీనం గా .
భర్త వంక దీనంగా చూసి ఫోన్ తీసింది శశికళ .
ఈ అప్పులవాళ్ళ గోల ఏమిటీ ? ఇతను ఇంతగా బెదిరిపోవటమేమిటి ? అన్ని ప్రశ్నలే కదా ? ఆ ప్రశ్నలకి సమాధానాలు "అప్పిచ్చువాడు - వైద్యుడు " లో మాత్రమే దొరుకుతాయి .
ఇంతేనా అంటె ,
ఇంకా జీవితము లో మార్పు త్రిల్లూ వుండాలని భార్య ఎవరినైనా ప్రేమిస్తే , సహృదయం తో భార్యను క్షమించాలని వుబలాట పడి , భార్య ఎవరినీ ప్రేమించలేదని నిరుత్సాహ పడే విశ్వం గురించి "తిక్క కుదిరింది " లో ,
పాపం లక్షణం గా చదువుకొని సుమారైన ఉద్యోగాలు చేసుకుంటూ దర్జాగా బతికిన వాళ్ళు , బొచ్చెలూ , కడవలూ వగైరా పరికరాలు అందుకొని , సతీ సమేతం గా తమ దీనస్తితికి తామే జాలిపడుతూ మేస్త్రీ యాదగిరి తో చివాట్లు తినే పరిస్తితి ఎందుకు కలిగిందీ అంటే నేనేమి చెప్పగలను ? "ఇల్లుకట్టి చూడు " చదివితే తెలుస్తుంది .
చక్కని చుక్కలాంటి అమ్మాయి రాధ . సలక్షణమైన సంబంధం చూసి పెళ్ళి చేసుకోమంటే నాకు పెళ్ళి వద్దు సినిమాల్లో నటిస్తా అనంటుంది . తండ్రి వొప్పుకోకపోతే , పెళ్ళికొడుక్కు నువ్వంటే నాకు ఇష్టము లేదని చెపితే పెళ్ళి తప్పిస్తాడేమో అనుకుంటే "నాకు ఈ పెళ్ళంటే చచ్చేంత ఇష్ట మోర్రో " అని పట్టు బట్టి రాధను పెళ్ళి చేసుకున్నాడు కుర్రడాక్టర్ వంశీ . పాపం రాధ కోరికో అంటారా ఆ((( . . .ఏమైందో "తీరని కోరిక " చదువుతే తెలుస్తుందిగా !
హైద్రాబాద్ నుంచి శ్రీకాకుళం , శ్రీకాకుళం నుంచి నుంచి విజయనగరమూ తిరగటమెందుకు ? ఇద్దరమూ హైదరాబాద్ లోనే వున్నాము కదా ఇద్దరమూ ఇక్కడే కలుసుకొని మాట్లాడుకుందామని పెళ్ళి కూతురు పద్మ ను వొప్పిస్తాడు పెళ్ళికొడుకు డాక్టర్ . కల్యాణ చక్రవర్తి .పెళ్ళి చూపుల కోసం ఇందిరాపార్క్ కు వచ్చిన పద్మకు పెళ్ళికొడుకు , ఇన్సర్ట్ సగము బయటకు వచ్చి , జుట్టు చెదిరిపోయి , చంకలో రెండేళ్ళ పిల్లాడు , ఇంకో చేతిలో బాగు తో దర్శన మిస్తే . . . హా హ హ హ . . . హమ్మ హమ్మ . . . కొంచమాగండి బాబూ నవ్వీ నవ్వీ నా పొట్ట చెక్కలైపోతొంది :) ఇహ నేను చెప్పలేనండీ బాబు . మీరే చదువుకోండి . ఎక్కడా . . . అని ధీర్గం తీయకండి , చెప్తున్నా ,,, చెప్తున్నా ,,,

హాస్య రచనలు చేయటము లో చేయి తిరిగిన రచయిత్రి "పొత్తూరి విజయలక్ష్మి " గారి , " మా ఇంటి రామాయణం " ( హాస్య కథల సంపుటి ) అర్జెంట్ గా విశాలాంద్ర నుంచి 80 రూపాయలకు కొనుక్కొచ్చుకొని చదివేయండి . ఇంతే నా ఇంతేనా అనకుండా అందులో మొత్తం 14 కథలు వున్నాయి . అయ్యో ఇన్నేనా ఇంకొన్ని కథలు ఇందులో రాస్తే ఆ రచయిత్రి సొమ్మేం పోయిందిట అనిపించకపోతే నన్నడగండి . పుస్తకం కాదు . చదివి వాపసు ఇస్తానంటే ఇస్తాను కాని , మీరు తిరిగి ఇస్తారన్న నమ్మకం నాకేమాత్రం లేదు . " అయ్యో మాలా గారూ , మా చంటాడు చింపేసాడండి ." అని అబద్దం ఆడి ఇనప్పెట్టిలో దాచేసుకుంటారు . అందుకని ఇవ్వను . ఆ ఆశ పెట్టుకొకుండా మీరే కొనుక్కొచ్చుకొని చదివేసి మనసారా నవ్వేసుకోండి . నాకు తెలుసు మీరూ ఆ పుస్తకం ఎవరికీ ఇవ్వరు :)